Shooter [S03 : E01] | අතීත ආවර්ජනා…

ඔන්න එහෙමනම් මේ සූදානම බයිස්කෝප්වාසී රසික රසිකාවියන් පුනපුනා නොඉවසිල්ලෙන් මග බලා සිටි SHOOTER කතාමාලාවේ තුන්වෙනි අදියර ඔබ හමුවේ තබන්නයි. හරි එහෙමනම් අපි අද කොටස ගැන බලන්නට මත්තෙන් කතාවෙ මෙතෙක් ගමන්මග ගැන කෙටියෙන් වගේ මතක් කරගෙනම ඉමුකො එහෙනම්..

පලමුවන කතාමාලාව.

පළවැනි කතාසමය ආරම්භ වන්නේ බොබ් ලී ස්වැගර් නම් වූ අතිදක්ෂ ඇමරිකානු ස්නයිපර්වරයා යුක්‍රේන ජනපතිවරයාව ඝාතනය කිරීමත් සමගින්. ඉතින් කට්ටියට මතක ඇතිනේ බොබ් ලී ස්වැගර් කියන්නෙ ඇමෙරිකාවේ පමණක් නෙවෙයි සමස්ත ලෝකයටම ඉන්න අතිදක්ෂ සහ මාරාන්තික දිගුදුර වෙඩික්කරුවෙකු එනම් ස්නයිපර් කෙනෙක් බව. සිය හමුදා සේවයෙන් අස්වෙන ස්වැගර් තමන්ගේ බිරිද සහ කුඩා දූ පොඩිත්ත සමග ඉතාමත් සාමකාමී සතුටුදායක ජිවිතයක් තමයි ගත කරමින් හිටියේ. ඔන්න ඔහොම ඉන්න කොට තමයි ස්වැගර්ගෙ මිතුරෙක් වගේම ඉහළ නිළධාරියා වෙලා හිටිය කැප්ටන් ජොන්සන් ස්වැගර්ව හොයාගෙන එන්නේ උදව්වක් ඉල්ලගන්න. ජොන්සන් කියන්නෙ ටී සොලටෝව් කියලා කියන ස්නයිපර් ඝාතකයා ඇමෙරිකානු ජනපතිවරයාව නසා දමන බවට තර්ජනය කරලා තියෙන නිසා ඔහුව අල්ලගන්න ස්වැගර්ගේ සහය අවශ්‍ය බවයි. ස්වැගර් උදව්වට ගියත් ඝාතනය සිද්දවෙනවා මතකයිනෙ.. හැබැයි මැරෙන්නෙ ඇමෙරිකානු ජනපතිවරයා නෙවෙයි යුක්‍රේන ජනපති. ඉතින් මේ සිද්ධියට අහුවෙන්නේ බොබ් ලීව. එතැන් පටන් බොබ් ලීට සිද්දවෙනවා නීතියේ රැහැනින් පලා යමින් තමන්ව මේ ඝාතනයට කොටු කළ තැනැත්තන් පසුපස හඹායාමට. මේ කාර්යයට ස්වැගර්ට තවත් කෙනෙක් සහය දෙනවා. ඒ FBI නියෝජිතවරියක් වෙන නාදින් මෙම්ෆිස්. ඉතින් මේ ගැන හොයාගෙන යද්දී දැකගන්න ලැබුනානෙ ඒකට ඇමෙරිකානු රජය ඇතුළේ ඉතාමත් බලගතු පුද්ගලයන් පවා සම්බන්ධයි කියලා. කොහොමහරි ස්වැගර් සිය නිර්දෝෂීභාවය ඔප්පු කරගන්න සමත්වෙනවා.

දෙවන කතාමාලාව.

දෙවැනි කතාසමය ආරම්භ වන්නේ ස්වැගර් සිය හමුදා මිතුරකුගේ පදක්කම් ප්‍රදානෝත්සවයකට ජර්මනියේදී සහභාගී වී සිටින සිදුවීමකින්. ඒ එම ස්ථානයට ත්‍රස්ත ප්‍රහාරයක් එල්ල වීමත් සමගයි. හැමෝම මේ සිදුවීම ත්‍රස්ත ප්‍රහාරයක් කියලා හිතුවත් ස්වැගර් දකින්නෙ ඒක සැලසුම්සහගත ලෙස මැරීන් භටයින් ඉලක්ක කරමින් සිද්දවෙන්නා වූ ඝාතන තැතක් ලෙසයි. ඉතින් ඒ ගැන හොයාගෙන යද්දී ස්වැගර්ට දැනගන්න ලැබෙනවා මෙලෙස ඝාතනයට ලක්වන්නේ කැප්ටන් ජොන්සන් සහ ස්වැගර් සමගින් එකම හමුදා ඒකකයක සේවය කළ පිරිසක් බව. ඉතින් මේ ගැන තවදුරටත් හොයාගෙන යද්දී දැනගන්න ලැබෙනවා එම ඝාතනවලට ටී සොලටෝව් සෘජුවම සම්බන්ධ බවත් ඇට්ලස් නම් වූ යම්කිසි රහස් සංවිධානයක් ගැනත්. ස්වැගර් සහ සොලටෝව්ගේ කුඩා යුද්දය ඉවරයක් උනේ අවසානයේදී ස්වැගර් සොලටෝව්ගේ ග්‍රහණයට නතුවීමෙන් කියලා කට්ටියට මතකයිනේ.

හරි එහෙමනම් දැන් තුන්වැනි කතාසමය පටන්ගන්න එතන ඉදලා. අපි එහෙනම් බලමු මේ පාර ස්වැගර්ට මුහුණ දෙන්න වෙන්නෙ මොන වගේ නස්පැත්තියකටද කියලා. මතකනේ ගියපාර ස්වැගර්ව සොලටෝව් අල්ලන් ගියා එතනින් තමා කතාව ඉවර උනේ. ඉතින් ස්වැගර් ලව්වා ඇට්ලස් බැංකු ගිණුම විස්තර හංගලා තියෙන තැනට තමයි සොලටෝව් යන්නේ. ඒ වගේම ජෝසන් ජූලි එක්ක පස්සෙන් පන්නනවා. අනික මේ පාර නොසිතු දිසාවකට කතාව යොමු වෙන පාටක් තමා පේන්නේ….

එහෙමනම් මම මේ ටික විතරක් කියලා නවතිනවා.. ඊළග සතියෙ ලිපියෙන් මේ පාර කතාමාලාව ගැන විස්තර ටිකක් කියන්නම්කො.. එහෙනම් ලබන සතියෙ හමුවෙමු. එතෙක් ජයවේවා.