Robin Hood (TV Series 2006–2009) [S02 : E04] | මරණයේ සුරදූතිය!

ඉතින් අද අරන් එන්නේ රොබින්හුඩ් දෙවනි කතා සමයේ, හතරවැනි කොටසයි. මේ උපසිරැසියේ ලයින් වල තත්පර ගණන් එහාමෙහා වීම් නම් ඇති. ඒත් ඉංග්‍රීසි උපසිරැසියක් විදියට මට හම්බවුනේ මේක විතරයි. පොඩ්ඩක් එහාමෙහා වුනාට බලන්න ඒක ප්‍රශ්නයක් වෙන්නේ නෑ. ඉතින් අපි බලමුකෝ, මේ සැරේ කොටසෙදි මොකක්ද සිද්ධ වෙන්නේ කියලා.

පසුගිය කොටසින්…

කළු නයිට් හමුදාවට අළුත් යුධ ඇඳුමක් හදවන ෂෙරිෆ්, ගිස්බන්ටයි ඒක පරීක්ෂා කරන්න දෙන්නේ. මේ පරීක්ෂණය කැලේ මැද්දේ රහසිගතව කරනකොට, ළමයි කණ්ඩායමක් ඒක දකිනවා. ගිස්බන් මේ ළමයි ටික අල්ලගනිද්දි, පැනලා යන එක ළමයෙක් – ඩැනියල්, රොබින්හුඩ් කණ්ඩායමේ උදව් ඇතිව තමන්ගේ යාළුවන්ව බේරගන්නවා. රොබින් අර ඇඳුම හදන්න අවශ්‍ය කළු දියමන්ති හොරකම් කරගන්න අතරේ,  ඩැනියල්ව ගිස්බන්ට අහුවෙනවා. රොබින්, මැරියන්ගේ උදව් ඇතිව, මේ ළමයා බේරගන්න සැලසුමක් හැදුවත්, ගිස්බන්ට ඇලනඩේල් ඔක්කොම කියන නිසා ඒක වරදිනවා. අවසානයේ කළු දියමන්ති වෙනුවට ඩැනියල්ව හුවමාරු කරන්න ගිහින්, රොබින් ගිස්බන්ව නොමරා මරලා, කළු දියමන්ති ටික විනාස කරන විදියයි ගිය සැරේ ඔයාලා දැක්කේ.

මෙවර කොටසින්…

විල් ස්කාලට්ගේ තාත්තයි, මල්ලියි දෙන්නා ගමෙන් පැනලා ගිහින්, එයාලගේ නැන්දා ඉන්න ස්කාබරෝවලට ගිය බව ඔයාලට මතක ඇතිනේ. ඉතින් මේ කොටසෙදි එයාලා ආපහු එනවා, විල්ව එයාලගේ දිහාවට එක්ක යන්න. විල් ඒකට කැමති නොවෙන නිසා, රොබින් එයාලට කියනවා, මුලින් තමන් මෙහෙ කරන වැඩ මොනවද කියලා බලලා යන්න කියලා. ඉතින් කට්ටිය මේකට නොටින්හැම් ගිය වෙලාවෙදි සිද්ධ වෙන්නේ නොහිතූ දෙයක්. ඒ වගේම රාත්‍රී රැකවලා වගේ වෙස්වලා ගත්ත වෙන කෙනෙක්, පාරවල් දිගේ කෑම බෙදබෙදා යනවා. මේ කෙනා ෂෙරිෆ්ගේ මාලිගාවට අළුතින් ආපු කෙනෙක්. ඉතින් එහෙන් ආව කෙනෙක්, කීයටවත් මිනිස්සුන්ට හොඳක් නම් කරන්නේ නෑනේ. ඔයාලම බලන්න, ඒ සිද්ධවෙන අළුත් සෙල්ලම මොකක්ද කියලා. මම ඊළඟ කොටසින් ආයෙත් හමුවෙන්නම්. එතකම් ඔබට සුබ දවසක්!