Vikings [S06: E10] | දෙවියන් අත්හළ මරණයේ භූමිය..!

ආයුබෝවන්..!

ඔව්, ඔව් ඉතිං හිතාගන්න බැරි තරම් පරක්කුයි තමයි. මට ඇත්තටම වෙලාව හොයාගෙන මේක මහන්සි වෙන්න කාලෙ ලැබුනෙ නැහැ එකදිගට මේක කරල ඉවරයක් කරගන්න. කොහොමහරි සෑහෙන ප්‍රමාදයක් එක්ක මේ අරගෙන ආවෙ වයිකින්වරුන්ගේ කතා මලාවේ අවසාන කතා මාලාවේ මිඩ් සීසන් ෆයිනල් එපිය. ඒ කියන්නෙ ආයෙ නැවත වයිකින්වරු එක්ක අවසාන චාරිකාවට එකතු වෙන්නෙ 2020 නොවැම්බර් වගේ කාලෙ. ඒ අතරෙ ඔන්න අද වෝකින් ඩෙඩ් කතා මාලාවේ දහවැනි කතා මාලාවේ අවසාන කතාංග අට නිකුත් කිරීම ආරම්භ වුණා. ඒ අනුව අද නිකුත් වුණා වෝකින් ඩෙඩ් 10×9 කතාංගය. ඉතිං රෑ ජාමෙ වෙද්දි ඒකත් ලබා දෙන්න උපරිම උත්සාහයක යෙදෙනව. හරි එහෙනම් බලමු වයිකින්වරුන්ට මොකෝ කලින් වුණේ කියල.

මේ වෙනකොට රුස් හමුදාව එක් රැස් වෙමින් ඉන්නෙ ස්කැන්ඩිනේවියාව ආක්‍රමණය කරන්න. ඔලෙග් කුමාරයා යටතේ මහා හමුදාවක් රැස් වුණා අපි කලින් කතාංගයේ දැක්ක. මේ හමුදාව එක්ක සටන් කරන්න ඕන නිසා බියෝන් තීරණය කරනව හැරල්ඩ් රජු එක්ක තියෙන තරම මරහ අමතක කරල මිත්‍ර පාර්ශව විදියට එකතු වෙලා සටන් කරන්න. ඒ අනුව තමයි එරික් රාජ දූතයෙක් විදියට හැරල්ඩ් රජු මුණගැහෙන්න යන්නෙ. ඔහොම ගිහින් කට්ටිය සමාදාන වුණත් රුස් හමුදාව එක්ක හැරෙන්න තරම් ලොකු හබලක් මේ කිසි කෙන්කුට නෑ. මේ අතරෙ තමයි ගුන්හ්ල්ඩ් රැජිණියගේ දරුවා ගබ්සා වෙන්නෙ. මේ සිදුවීම යුද්ධයේදී ගුන්හිල්ඩ්ගේ දායකත්වය වැඩි වෙන්න හේතු වුණත් සෑහෙන දුක්බර සිදුවීමක්. ඒ වගේම අද කතාංගය තුළ වෙන දේවල් හරියටම පැහැදිලි කර ගන්න වෙන්නෙ ඊලඟ කතාංග 10 නිකුත් වුණාම තමයි. මොකද සෑහෙන මරණ ප්‍රමාණයක් අද සිද්ධ වෙනව වගේම, ඒ හැම කෙනෙක්ම මෙතෙක් කතාවේ ආපු දැවැන්ත චරිත. ඉතිං මේ පැටළිල්ල ලිහාගන්න ටික කාලයක් බලාගෙන ඉන්න වෙනව.

ඒ අතරෙ දැන් ඌබේ ඉන්නෙ අයිස්ලන්තයේ. ඔතෙරෙ කියන මනුස්සයගෙ සැබෑ තත්වෙ ගිය සතියෙ එළි වුණා. ඔතෙරෙ ලඟ ෆ්ලෝකිගෙ මගුල් මුද්ද තිබුණු එකෙන් පෙනී යන්නෙ, අපිට ආයෙත් ෆ්ලෝකිව පණපිටින් දකින්න ලැබෙන එකක් නෑ වගේ. මොකද ෆ්ලෝකි අර ගුහාව ඇතුළෙදි හොයා ගත්තෙ ඔතෙරෙ දෙවියන් යදින්න හදපු කුරුසිය වෙන්න ඕනෙ. මොකද ඔතෙරෙගෙ සැබෑ ස්වරූපය අනුව ඔහු ක්‍රිස්තියානි පූජකයෙක්. මතකනෙ නමත් ඇතෙල්ස්ටන් කියල තමයි කිව්ව. ඒකෙන් අපිට පරණ ඇතෙල්ස්ටන්වත් ආයෙ මතකයට එනව. ඉතිං මේ ඇතෙල්ස්ටන් නැත්තං ඔතෙරෙ, ෆ්ලෝකිව මරන්න ඇති. ඒක පැහැදිලිවම අපිට ඊලඟ කතා සමයෙන් දැනගන්න ලැබෙයි. එහෙනම් ඉතිං වෝකින් ඩෙඩ් සමඟ ආයෙ හමුවෙමු. ජය වේවා..!