Ask Laftan Anlamaz [S01 : E31] | අමිල ආදරයක නොනිමි අවසානය..!

තාමත් ආදරේ නැත්නම්
හදවත පාඩුවේ ඇත්නම්
ඇස් ඉස්තරම් නිසා
බලමුද ආදරේ දිහා.
මා හදේ කිදී රැදී තිබු කතා නිමා නොවේ ද
නෑ අතීතයේ ගිලෙන්නේ මා…
හිදින්නනම් සුසුම් ලෙසේ ඔබේ හදේ රැදී ඉන්න
ආදරෙන් තුරුල් වෙලා…

“එක කෙල්ලෙක් හිටියා. කෙල්ල ගමකින් ආපු කෙනෙක්. ජොබ් එකක් හොයාගෙන තමා ඉස්තාන්බුල් ආවේ. යාළුවො දෙන්න එක්ක එක කාමරේ බෙදාගෙන, කටු කාගෙන කෙල්ල හැමදාම ජොබ් හොය හොය ඇවිද්දා. ඔය අතරේ තමා කෙල්ලට නමගිය කම්පැනියකින් ඉන්ටවීව් එකකට කතා කරේ. බලාපොරොත්තු ගොඩක් පොදි බැඳන් කෙල්ල එදා ඒ කම්පැනියට යන්න පිටත් වුණා. අතරමගදී කෙල්ලට අලකලංචි ගොඩකට මූණ දෙන්න වුණා. ටැක්සි තිබ්බෙත් නෑ. දෙයියනේ කියලා හම්බෙච්ච ටැක්සියට මහ එපා කරපු කොල්ලෙක් කොහෙන්දෝ පාත් වුණා. ඒ වෙලේ ඉඳන් ඒ කොල්ලාගෙන් මේ කෙල්ලට සිද්ධ වුණේ පාඩුමයි. කෙල්ල මුළු ලෝකෙටම ශාප කර කර ඉන්ටවීව් එකට ගියේ. ඒත් ඉන්ටවීව් එකට ආපු අනිත් කෙනාට මෙයාට වඩා ගොඩක් සුදුසුකම් තිබ්බා. කෙල්ලට මේ ජොබ් එකත් හීනයක් වගේ වුණා. ඒත් හදිසියෙම පොඩි අහම්බයක් සිද්ධ වුණා. ඒ අහම්බයෙන් මේ ජොබ් එක කෙල්ලට හම්බෙනවා. හැබැයි ඒ වෙනුවෙන් කෙල්ලට බොරු ගොඩක් කියන්න වුණා. ඒ කෙල්ලට වෙන කෙනෙක් විදිහට ජීවත් වෙන්න වුණා. කෙල්ල බොරු කිව්ව එක ගැන පසුතැවුනා. හැබැයි ජොබ් එකට ලෝබකමේ හැමදේම හංගන් හිටියා. කෙල්ලට තරු පේන්න ගත්තේ කම්පැනියේ බොස්ව දැක්කමයි. ඒ අර පාරෙදි හම්බවෙච්ච මහ එපා කරපු කොල්ලා. කෙල්ලට තියෙන්නේ බොස්ගේ සහයට වැඩ කරන්නයි. ඉතින්, ඉස්සරහට කරදර ගොඩකට මූණ දෙන්න හිත හදාගෙන කෙල්ල ජොබ් එක කරන්න ගන්නවා. ඒත් අර බොස් එක්ක හැමදාම වලි. කෙල්ලත් නෙමේ සෙකන්ඩ් වෙන්නේ. දෙන්නට දෙන්නා පුදුම විදිහට ඇරියර්ස් කවර් කරගන්නවා. හැබැයි ඒ වගේම දෙන්නා නොදැනුවත්ම දෙන්නට දෙන්නා ආදරේ කරන්න ගන්නවා. කාලේ ටික ටික ගෙවිලා යනවා. එක්කෙනෙක්වත් තාම ආදරයක් ගැන ප්‍රකාශ කරලා නෑ. හැබැයි මූණු වලින් නම් හොඳට පේනවා. මේ විදිහට මෙයාලගේ කතාව ගලාගෙන යනවා. මෙයාලගේ ආදරේට බාධා අහස උසට තිබ්බා. එයාලට කොයි වෙලෙත් අත දෙන්න වගේ එයාලව වට්ටලා දාන්නත් වෙනම සෙට් එකක් හිටියා. මේ හැමදේම අතරින් මේ ආදරේ දවසින් දවස ගලාගෙන ගියා. මේ අපි අද දකින්න යන්නේ ඒ ආදරේ අවසන් පරිච්ඡේදය…”

මේ අවුරුද්දේ පෙබරවාරියේ 14 වෙනිදා, ඒ කියන්නේ හරියටම වැලන්ටයින් දවසේ බයිස්කෝප් අපි ඔයාලට තෑග්ගක් දෙන්න හිතුවා. ඒ තමයි මුළු ලොවක් ආදරයෙන් උමතු කළ ඒ අපූරු ආදර කතාව Ask Laftan Anlamaz.එහෙම නැත්තම් ශ්‍රී ලාංකීය ටෙලිවිෂන් ප්‍රේක්ෂකයින් දන්න විදිහට හිරු නාලිකාවේ විකාශය වෙන “තාමත් ආදරේ නැත්තම්” ටෙලි නාට්‍යය. ඉතින් එහෙම දෙන්න පටන් ගත්තු තෑග්ග, මේ සැප්තැම්බර් මාසේ, ඒ කියන්නේ මාස 07කින් අපිට පුළුවන් වුණා සම්පුර්ණයෙන්ම දීලා ඉවරයක් කරන්න. මම දන්න විදිහට නම් මේ ලිපිය ලියන මොහොතේ අදාළ රූපවාහිනි නාලිකාවේ විකාශය වෙන්නේ පැය දෙකහමාරක ධාවන කාලයක් සහිත 19 වෙනි කොටසට අදාළ ජවනිකා කිහිපය. ඉතින් කතාව සම්පුර්ණයෙන්ම ඉවරයක් කරද්දී ඒ කියන්නේ සම්පුර්ණ කොටස් 31ම විකාශය කරලා ඉවර වෙද්දී, ආසන්න වශයෙන් තව විනාඩි 20 කොටස් 150ක්වත් යාවි කියලා තමා මට හිතෙන්නේ. ඉතින් අපිත් එක්ක දිගටම රැඳුනු රසික පිරිසට නම් පුළුවන් අදම මේ අන්තිම කොටසත් තේරෙන සිංහලෙන්ම බලන්න.

ඉතින් අද මෙහෙම උදාන ගී කියන්න පුළුවන් වෙන්නේ ඉෂාන් සහෝදරයා නිසා. මොකද රූපවාහිනියේ මේක පෙන්නනවා කියලා දැනුම් දෙන්නත් කලින් ඉඳන්ම මේක ඉෂාන් සහෝ මේ කතාමාලාවටම තනියම උපසිරැසිගන්වමින් හිටියේ. කොහොමහරි රූපවාහිනියේ පෙන්නන්න අරන් තියෙද්දී ඉෂාන් සහෝ කොටස් 09කටම උපසිරැසි ගන්වලා අහවර කරලා තිබ්බා. එහෙම අත්තිවාරමක් මේ වැඩේට නොතිබුනා නම් අපි කවුරුත් මේකට අත නොගහන්න තිබුණා. ඉතින් ඒ මුදුන් මුලට ස්තුති කරන අතරේ අපේ හසන්ත අයියා, විමා, සිසිල, ආසිරි අයියා ඇතුළු ඇඩ්මින් මඩුල්ලට ස්තුතිවන්ත වෙන්න ඕන වෙබ් අඩවියේ ප්‍රතිපත්ති පොඩ්ඩක් ලිහිල් කරලා කොටස් 9ක විතරක් උපසිරැසිගන්වලා තිබ්බ මේ කතාමාලාව අපි ගැන විශ්වාසය තියාගෙන පළ කරන්න තීරණය කරාට. සාමාන්‍යයෙන් සම්පුර්ණ කතාමාලාවම උපසිරැසි ගන්වලා නැත්තම් වෙබ් අඩවියේ පළ කරන්නේ නැහැ. ඒකයි නීතිය. ඉතින් එහෙමයි වුණේ. අවසර දුන්නට පස්සේ උපසිරැසි ගන්වන්න එපැයි, ඒකට කාලරාමු තියෙන්න එපැයි. ඉතින් ලස්සනට කොටස් ගානකට කාලරාමු හදලා දුන්නු තිසර සහෝදරයව ගොඩක් ආදරෙන් මතක් කරන්න ඕන. ඊට පස්සේ හසන්ත සහෝ, රංග සහ සඳුන් අයියවත් මතක් කරනවා කාලරාමු සකසලා දුන්නු එකට. ඊට පස්සේ උපසිරසිය කරන්න අපේ බයිස්කෝප් සෙට් එකක්ම හිටියා කියලා ඔයාලා දන්නවනේ, ඉශූ සහෝදරයා ඇතුළුව හෙලිලි, නවෝදනී, පුර්ණිමා, හිරාන්, රෂීන්, යසිරු කියන අපේ සෙට් එක සිහි කරන්න ඕන. නම් ටික දැම්මේ කරපු උපසිරැසි සංඛ්‍යාව අනූව කියලා කරුණාවෙන් සලකන්න. ඒ වගේම හෙලිලි සහෝදරියට විශේෂයෙන් ස්තුතිවන්ත වෙනවා කොටස් බොහොමයකට පිරිපුන් ලිපි ටිකක් සපයලා දුන්නට. මොකද, වෙනම අමාරුවක වැටෙනවා අපි ලිපි ලියන්න ගියා නම් එහෙම. ඔය අතරේ මේ හැමදේම කෝඩිනේට් කරේ, කලට වෙලාවට උපසිරැසිය කරලා දෙන්න අපිව මෙහෙයවුවේ සුපුරුදු පරිදි අපේ හසන්ත අයියා, ගොඩක්ම ස්තූතියි. අන්තිමට ස්තුති කරන්න ඕන ඔයාලට. ඔයාලගේ නොඉවසිලිමත් කමෙන්ට්ස් ටික, බාගත කිරීම් ටික නැත්තම් මේක නොකඩවා කරන්න අපිට ශක්තියක් නැතිවෙන්න තිබ්බා. නම් වශයෙන් සඳහන් කරන්න අමාරු උනත් හැමදාම අපිට කමෙන්ට් එකකින් සංග්‍රහ කරලා යන හැමෝටම අපේ උත්තමාචාරය පුද කර සිටිනවා. ඉතින් ඒක තමා ස්තුති කතාව. මහ ලොකු වැඩක් කරා කියනවා නෙමේ, අද හරි සතුටු දවසක්. අපි සෙට් එක පටන් ගත්තු වැඩේ අද ඉවරයක් කරලා දැම්මා. සමාවෙන්න ඕන මං වැරදි නම්, බයිස්කෝප් එකේ දැනට තිබ්බ ලොකුම ටීම් වර්ක් එක මේකයි මම හිතන විදිහට. නුපුරුදු භාෂාවක පැය දෙකහමාරේ ටෙලි කතාවක්, ඉංග්‍රීසි උපසිරසියේ අඩුපාඩුත් එක්කලම, කොටස් බහුතරයකටම කාලරාමුත් ගහගෙනම කරපු මෙහෙයුමක් මේක. ඒ නිසාමයි මම එහෙම කිව්වේ. උපසිරැසි වල අඩුපාඩු නම් එමට ඇති. ඒවට සමාව ඉල්ලනවා මේ ගමනම.

එහෙනම් සමුගන්නයි මේ ලෑස්තිය. සතියට කොටස ගානේ දෙන්නම් කිව්වට කොටස් තුනක් විතර සති දෙකක විතර ප්‍රමාදයට ලක්වුණානේ. ඔන්න අන්තිම කොටස් කිහිපය බැක් ටු බැක් දුන්නා ප්‍රමාදය කවර වෙන්නත් එක්ක. එහෙනම් අද නම් බලාපොරොත්තු වෙනවා බාගත කිරීම් සංඛ්‍යාව ආසන්නයට එන කමෙන්ට්ස් සංඛ්‍යාවක්. බාගෙන යන ගමන් ඔන්නොහෙ මොනාහරි කොටාගෙන යන්න. ආ.. තව දෙයක් කියන්න ඕන. තවත් ආස කරන මේ වගේ ලස්සන තුර්කි කතා තියේ නම් ඔහොමම කියාගෙන යන්න. දරාගන්න පුළුවන් තත්වයක සම්පත් තියේ නම් ආයේ එහෙම වැඩකට බහින්න අදහසක් තියෙනවා. සම්පත් කිව්වේ, ප්‍රධානම දේ හොඳ ඉංග්‍රීසි උපසිරසියක්. මොකෝ අපිට තුර්කි පුළුවන් එකක්යැ. කරුණාකරලා මුතු අහුර හෝ Ezel කියන කතා යෝජනා කරන්න එපා. ඒවා කරාට ප්‍රායෝගිකව ගැටළු කිහිපයක් මතු වෙනවා. මුතු අහුර සැලකිය යුතු කොටස් ගාණක් විකාශය වෙලා සහ මම දන්න විදිහට ඔරිජිනල් ටෙලිකතාවේ කොටස් 100 පන්නලා තියෙනවා. ඉතින් ඕකට කාලරාමු හදාගෙන උපසිරැසිය කරා කියලා මහලොකු පිරිසක් අපි එක්ක එකතු වෙන එකක් නැහැ. ඒ නිසා ඒ කතා දෙක ඇරෙන්න වෙන දන්න කියන කතන්දර තියේ නම් අපිට කියන්න. අපි උත්සහයක් දාන්නම්. එහෙනම් ආයේ සතියෙන් සතිය මග බලන් ඉන්න දෙයක් නැහැ. මෙතනින් වැඩේ ඉවරයි. අපි සමුගන්නවා. දිගටම බයිස්කෝප් අපිත් එක්ක එකතුවෙලා ඉන්න. හැමෝටම ජයවේවා…