Pennyworth (2019-) [S01 : E03] | මාර්තා කේන් සහ ජරමර!

ඔන්න එහෙමනම් පෙනීවර්ත් කතාමාලාවේ තුන්වැනි කොටස කට්ටිය හමුවට රැගෙන ආවා. මුලින්ම මේ කතාමාලාව සමගාමී විකාශය එක්ක දෙන්න හිතා හිටියත් විවිධ හේතු කාරණා නිසා ඒක කරන්න බැරි වුනා. ඒ අනුව තමයි මේ විදිහට විකාශනය අවසන් වීමෙන් පසුව එකපෙළට කතාව දෙන්න තීරණය කළේ. ඉතින් මේ කොටසත් සමගින් මෙහි මගේ කාර්‍යබාරය අවසන් වෙනවා. එහෙමනම් අපි බලමු කතාවේ මොකද වෙන්නේ කියලා.

කලින් කතාව ගැන මතක් කරගත්තොත් තෝමස් වේන් නිසා ඇල්ෆ්‍රඩ්ට සෑහෙන්න ලොකු කරදරයක වැටෙන්න උනානෙ. කාක සංසදයෙන් තෝමස් වේන්ව අල්ලගන්න බැරිවෙච්ච නිසා ඇල්ෆ්‍රඩ්ගේ පෙම්වතිය වෙච්ච එස්මේව පැහැරගෙන ගියේ ඇල්ෆ්‍රඩ් ලව්වා තෝමස් වේන්ව අල්වාගැනීමේ අපේක්‍ෂාවෙන්. නමුත් හමුදාවේ විශේෂ හමුදා ඛණ්ඩයක භටයෙක් විදිහට ඇල්ෆ්‍රඩ් හොදින්ම තේරුම් ගත්තා තෝමස් වේන්ව කාක සංසදය වෙත ලබා දීමෙන් පසුව තමන්ටද සිද්ධ වෙන්නෙ මරණය වැළදගන්න කියන එක. ඉතින් ඒ අනුව තමයි ඔහු සැලසුම් කළේ තෝමස් වේන්ව කාක සංසදයට බාර නොදීම එස්මේව බේරගන්න. ඉතින් මහා කලබැගෑනියකින් පසුව ඇල්ෆ්‍රඩ්ට හැකියාව ලැබුනා නිරුපද්‍රිතව එස්මේව මුදාගන්න. එමෙන්ම මතකයිනෙ ඇල්ෆ්‍රඩ්ට රැජිණ විසින් ඇයගේ අතින්ම සම්මානයක් එහෙමත් ලබලා දුන්නා.

ඉතින් ඇල්ෆ්‍රඩ් නිසා හිරබාරයට පත්වෙච්ච කාක සංසදයෙ දැනට දකින්න ලැබුණු ඉහළම බලධාරියාගෙන් කාක සංසදය පිලිබදව තොරතුරු ලබාගැනීමේ නිරර්ථක උත්සාහයක අගමැතිතුමා නිරත වෙනවා දකින්න ඇතිනෙ. කොච්චර වදහිංසා දුන්නත් හාර්වුඩ් වංශාධිපති කිසිම දෙයක් කියන්නෙ නෑ. ඔය අතරේ හාර්වුඩ්ට උදව් කළ එස්මේව පැහැරගෙන ගිය බවලතාව මරණ මංචකයට නියම වෙලා තිබ්බේ. නමුත් ඉතින් ඇය එයිනුත් බේරිලා පැනගත්තේ සමස්ත ලෝකයටම ඇය මියගියායැයි සිතන්නට සලස්වමින්.

ඉතින් පෙර කොටස් ඔය ආකාරයට ගෙවිලා යද්දී එස්මේ ඇල්ෆ්‍රඩ් දෙන්නා සතුටින් ජීවත් වෙනවා. ඉතින් ඇල්ෆ්‍රඩ්ගේ උවමනාව පරිදි අද මේ කොටසින් ඇල්ෆ්‍රඩ් යනවා එස්මේගේ පියාව මුණගැහෙන්න. නමුත් ඒක සිතූ ආකාරයට අවසන් වෙන්නෙ නෑ. ඉතින් ඇල්ෆ්‍රඩ්ට ඔහොම ඉන්න කොට තමයි එක පාරටම ඔහුගෙන් සේවය ලබාගන්න ඇමෙරිකානු කතක් එහි පැමිණෙන්නේ. ඇය නමින් මාර්තා, මාර්තා කේන්. ඉතින් මාර්තා කේන් ඇල්ෆ්‍රඩ්ගේ සේවය ලබාගන්නෙ ඉතාමත් ඉහළ මුදලකට. ඒ වගේම තමයි මාර්තා කියන විදිහටනම් ඇය සේවය කරන්නෙ කාක සංසදයෙ විරුද්ධවාදීන් වන නිර්නාමික මණ්ඩලයට.

ඉතින් අද ඇල්ෆ්‍රඩ්ට සිද්ධ වෙනවා අවිආයුධ මොකුත්ම නැති පිරිස් බලය නොමැති අවස්ථාවක කාක සංසදයෙ කල්ලියකගෙන් මාර්තා එක්ක ගිහිල්ලා එක්තරා පුද්ගලයෙක්ව බේරගන එන්න. එහෙමනම් අපි බලමු මොකද වෙන්නෙ කියලා.