Ask Laftan Anlamaz [S01 : E16] | කඳුලින්ම ලියූ පෙම් ගීතේ…

ආයුබෝවන්, කොහොමද? ඇඟිලි ගැන ගැන හිටපු 16 වෙනි කොටස ඔන්න අරං ආවා. මේ කතාව මගේ එකක් නම්නෙ වෙයි. මං මේ කතාවට සම්බන්ධ වුනේ මෙහෙමයි. මං රූපවාහිනි කතාංගයක් කරන්න ආසාවෙන් ඉන්නකොට අපේ හෙළිලි නංගි තමයි මේ කතාව ගැන කිව්වේ. ඉතින්, මාත් වෙනස් දෙයක් හින්දා කැමති වුනා. මට මේකට උපසිරැසි කරන්න උදව් කරපු, කතා නායකයා ඉෂාන් මධුෂංක සහෝදරයටත්, මයුර සුරාජ් සහෝදරයටත් ගොඩක් ස්තූති වෙන්න ඕනේ. ඒත් එක්කම ලිපිය ලියන්න උදව් කරපු හෙළිලි නංගිටත් ස්තූති වෙන්න ඕනේ. එහෙනම් කලින් කොටස මතක් කරලා ඉන්නම්.

හයාත් රස්සාව කරන තැනට බොරු කිව්වේ කියලා දැන ගත්තම හයාත්ගේ අම්මා එයාට කියන්නේ, වහාම රස්සාවෙන් අස් වෙලා ගමේ යමු කියලා. කොහෙද ඉතින්, හයාත් කෙල්ල හරි හිතුවක්කාරිනේ! ඊටත් වඩා රස්සාවෙන් අස් වුනාම මුරාත් ව බලන්නේ, හමුවෙන්නේ, ආදරේ කරන්නේ කොහොමද! හයාත්ගෙ අම්මා ඒවා දන්නෙත් නැහැනේ. කොහොමින් කොහොම හරි දකින්න ඇතිනේ, ඉඳලා ඉඳලා කෙරම් හරි පාරට වැටුනා. එහෙම බලද්දී දොරුක් නියම ආදර විශේෂඥයෙක් නේද!

හයාත් රෑ කොහෙද හිටියේ, මොනවද කරේ කියලා එයා, මුරාත්ට කීවේ නැහැනේ. මුරාත්ට ඕනේ ඒ ගැන දැනගන්න. ඒත්, ඒක කියන්න කියලා හයාත්ට බල කරන්නත් බෑ. මේ නිසා මුරාත් සැලැස්මක් හදනවා. ඒ තමයි හෝලි බදාදා සැලැස්ම! මේ සැලැස්ම නිසා සිද්ධ වුන රසවත් සිදුවීම් ටික ඔයාලට මතක ඇති කියලා හිතනවා. කොහොම අමතක කරන්නද? මුරාත්, දොරුක්, කෙරම් තුන්දෙනා කුකුල් මස් කකා, ෆිල්ම් බලන් ඉද්දී, හයාත්, ඉපෙක්, අස්ලි තුන්දෙනා හොරෙන් කඩා පැනපු හැටි! ඒ සිද්ධියත් එක්ක හ්‍යාත්-මුරාත්ගේ ආදරේ විතරක් නෙවේ, ඉපෙක්ගෙයි- කෙරම්ගෙයි ආදරෙත් වැඩි වුනා. ආදරේ වචන වලින් නොකීව අස්ලිටයි-දොරුක්ටයිත් හොඳ මතකයක් ගෙනාවා.

ඒ අතරේ හයාත්ගෙ අම්මගේ වදෙන් බේරෙන්න, හයාත් අම්මට ඇත්තම කියනවා, ඒ තමයි එයා කෙනෙක්ට ආදරේ කරනවා කියලා. ඕක කිව්ව වෙලාවෙ ඉඳන් හයාත්ගෙ අම්මට දැන ගන්න ඕන වෙන්නේ ඒ කොල්ලා කවුද කියලා. හයාත්වත්, අස්ලිවත්, ඉපෙක්වත්, ඉබ්‍රහිම්වත් කවුරුවත් ඒ කවුද කියලා කියන්නෙ නෑ. හැබැයි, මෝඩ අස්ලි කෙල්ල අඩ නින්දේ අතරේ එමිනෙට එයාගෙ කටින් අල්ල ගන්න පුලුවන් වෙනවා, හයාත්ගෙ කොල්ලා, මුරාත් කියනෙක.

හැමදේම හොඳින් සිද්ධ වෙද්දි, පුරුදු විදියටම දිදෙම් හැමදේම කඩා කප්පල් කරන්නයි යන්නේ. මුරාත්ට ව්‍යාපෘතිය නැති කරේ ඩේර්‍යා කියලා එයා මුරාත්ට කිව්වා, ඒ විතරක් නෙවේ, ඒක ඔප්පු කරන්න සාක්ෂි පවා තියනවා කිව්වා. මේ කපටිච්චි ඊට පස්සේ කරේ, ඉබ්‍රාහිම්ට කතාවක් ගොතලා කීව එක. ඒ තමයි මුරාත්, හයාත්ව රවට්ටනවා, මුරාත් අද රෑට එයාගෙ ගෙදරට එන්න කිව්වා, හොඳ මනුස්සයෙක් නම් තව කෙල්ලෙක්ට එහෙම එන්න කියනවද වගේ දේවල්. මේක අහපු ගමන් ඉබ්‍රාහිම් විශ්වාස කරේ නෑ. මේ නිසා දිදෙම්, මුරාත්ගෙ ගෙදර යන්නේ ඉබ්‍රාහිම් එක්ක. දිදෙම් මුරාත්ට කියන්නේ එයා එන්නේ සාක්ෂි පෙන්නන්න කියලා, ඉතින් මුරාත්නුත් අහු වෙනවා. ඉබ්‍රාහිම් මේ සේරම දේවල් එලියෙ ඉඳන් බලා ඉන්නවා. එයා විශ්වාස කරන්න ගන්නවා, මුරාත්, හයාත්ට කරන්නේ බොරුවක් කියලා. මේ නිසා ඉබ්‍රාහිම්, හයාත් ගැන සෑහෙන දුක් වෙනවා. ඒ නිසාම මුරාත්ගෙ කාර්‍යාලෙටම ඇවිත් මුරාත්ට තර්ජනේ කරලා යනවා. ඉබ්‍රාහිම් මේ තරම් හයාත් ගැන වද වෙන එක ගැන මුරාත්ට කේන්ති යනවා. මේ නිසා මුරාත්, හයාත්ටත් ඉබ්‍රාහිම් බැනපු කතාව ගැන කියලා කෑ ගහනවා. හයාත්ටත් හිතා ගන්න බැරි වෙනවා එහෙම වුනේ කොහොමද කියලා. මේ ප්‍රශ්නෙ තවත් වැඩි වෙන්නේ හයාත්ව කාර්‍යාලෙට එක්ක යන්නෙ මුරාත් නිසා, එයා වාහනෙන් එද්දි දකිනවා හයාත්, ඉබෝගෙ කැරවෑන් එකේ ඉඳන් රෑ ඇඳුම පිටින් එලියට එනවා දැක්කම. ඒ ගැන මුරාත් හයාත්ගෙන් ඇහුවම එයා කියනවා, ඉබෝ කියන්නෙ එයාගෙ නෑයෙක් කියලා. කොහොම වුනත් මුරාත් ගොඩක් කේන්තියෙන් ඒ වෙලාවෙ හයාත්ට කියනවා ඉබෝගෙන් ඈත් වෙලා ඉන්න කියලා.

ඔය අතරේ මුරාත් කොයි වගේ කොල්ලෙක්ද කියලා බලන්න එමිනේ යනවා සාර්ටේ එකට. නිකන් නෙවේ, එයා යන්නේ හයාත්ගේ හැඳුනුම්පත දෙන්න යනවා වගේ. කමුරාක් තමයි එමිනෙගෙ කොන්ඩේ එහෙම හදලා දෙන්නේ. මතක ඇතිනේ ඊට පස්සේ එමිනෙට හැඳුනුම්පත අමතක වෙලා, කමුරාක් ඒක අරන් සාර්ටේ එකට ගියා. එමිනේ සාර්ටේ එකට ගියාම, හැමෝම හිතන්නේ ඒ කටාර් වල ව්‍යාපාරික කාන්තාවක් කියලා. ඊට පස්සේ එමිනේ, මුරාත්වත්, මුරාත්ගෙ ආච්චි අම්මවත් මුණ ගැහුනා. ඒ විතරක් නෙවෙයි, හයාත්වත් මුණ ගැහුනා. හයාත් බොහොම අමාරුවෙන් අම්මව සාර්ටේ එකෙන් යවා ගන්නවා. ඒත් කොහොමහරි, අන්තිමේ හයාත්ගෙ හැඳුනුම්පත කුණු බක්කියට ගිහින්, එතනින් කෙරම්ගෙ අතට ආවා. හැඳුනුම්පත බැලුවම කෙරම් දකිනවා, ඒකෙ තියෙන්න ඕන සූනා පෙක්ටාස් වුනාට, නම තියෙන්නෙ හයාත් උසුන් කියලා. කෙරම් මේ ගැන ඉපෙක් ගෙන් ඇහුවා. ඉපෙක්ට තරු පෙනුනෙ එතනදි තමයි.

මුරාත් කලින් ඉඳන්ම හයාත්ට අනතුරු ඇඟෙවුවනේ ඉබ්‍රාහීම් ගැන, එයා එන පොට හොඳ නෑ කියලා. කිව්වා වගේම ඉබ්‍රාහීම් හයාත්ට ආදරෙයි කියල කියනවා. ඉබෝ ඒ වගේ දෙයක් කියන්න වැඩියෙන්ම හේතු වුනේ මුරාත්, හයාත්ට බොරු කරනවා කියලා එයා විශ්වාස කරන එක. වැඩෙ කියන්නේ ඉබෝ, හයාත්ට ආදරෙයි කියනවා මුරාත්ට ඇහුන නිසා ලොකු ප්‍රශ්නයක් තමයි ඇති වුනේ. ඊටත් වඩා හයාත් ඉස්සරහම ඉබෝ කියනවනේ, මුරාත්, දිදෙම්ව ගෙදරට ගෙන්න ගත්ත කතාවත්. ඉතින් මුරාත්ට කර කියා ගන්න දෙයක් නැති වෙනවා. මුරාත් ඒ විදියට අසරණ වෙද්දී, කෙරම් ඉස්සරහ ඉපෙක් ගොළු වෙලා!

ඊටපස්සේ මොකක් වෙයිද කියලාත් පොඩි ඉඟියක් දෙන්නම්. කෙරම් විතරක් නෙවේ හයාත් කියන්නේ සූනා පෙක්ටාස් නෙවේ කියන රහස තව කෙනෙක් දැන ගන්නවා. ඒ තමයි මුරාත්ගෙ ආච්චි අම්මා! ඊට පස්සේ එයා ඒක මුරාත්ට කියයිද? මම මෙහෙම කියන්නම්කෝ. මේ කොටස නොබැලුවොත් වැඩක් නෑ, අනිවාර්යෙන් බලන්න. දුක හිතෙයි, ඇඩෙයි, අන්තිමේ හරි ඔය මූණට හිනාවක් එයි කියන බලාපොරොත්තුවෙන් අවසානය දක්වා ඉවසන් බලා ඉන්න. එහෙනම් ගිහින් එන්නම්.

Direct Download