One Strange Rock [ S01 : 04 – Genesis] | DNA හෙවත් උත්පත්ති කතාව..!

අවවාදයයි!! වහා ඇබ්බැහි වන සුළුයි…

“අභ්‍යාවකාශයට ගියාට පස්සෙ මම දැක්ක, අන්ධකාර අවකාශයේ තියෙන මේ පණ ගැහෙන, හුස්ම ගන්න වායු බුබුළ.”

හිතන්න ජලය කියල දෙයක් ලෝකෙ නොතිබුණානම්, මොකක් වෙන්න පුළුවන් ද? ජලය තමයි ජීවයේ මූලික අඩිතාලම. ඉතිං ජීවයට පවතින්න ජලය විතරක් ඇතිද? නෑ නෑ ඔහොම ඉන්න. ඒකට තව කාරණා දෙකක් එකතුවෙන්න ඕනෙ. ඒ තමයි බලශක්තිය සහ රසායනිකයන්. මේ ඔක්කොම එකට එකතුවුණා කියමු. එතකොට ජීවය හට ගන්නවද? ඔයා අහල ඇති කතාවක් ජීවය ආරම්භ වුණේ සාගර පතුළෙන් කියල. හරි අපි ඒක එහෙම බාරගමුකො. සාගර පතුළේ යම් තැනක හරි අපූරු අබිරහස් දෙයක් සිද්ධ වෙනව. එතන ජීවය පවතින්න අවශ්‍ය සාධක ඔක්කොම පවතින තැනක්. පෘථිවි අභ්‍යන්තරයෙන් එන උණුසුම් ශක්ති ධාරා, ඒ මඟින් නිකුත් කරන රසායනිකයන්, සහ අසීමාන්තික සාගර ජලය. හරි ඔන්න අවශ්‍ය සාධක ඔක්කොම එකම තැන. දැන් ජීවය නැත්තං DNA හට ගන්න පුළුවන්. ජීවයේ වැදගත්ම අකුරු තුන වෙන්නෙ DNA. ඉතිං මේ තුන්කට්ටුවේ එකතුවෙන් DNA හට ගන්න පුළුවන් ද? වෝහ්… පොඩ්ඩක් ඔහොම ඉන්න. ඔය ඔක්කොම තියෙන තැන අමතක වුණාද? ඒ තමයි සාගර පතුළ. ජලය කියල කියන්නෙ ඕනම දෙයක් දිය කරල දාන්න සමත් කෙනෙක්. හොඳට මටත් කරල බලන්න දිය ඇල්ලක් ගැන. කාලයක් තිස්සෙ ජලය පහලට කඩා වැටිල, ඇල්ල ගලා හැලෙන පාෂාණයේ හැඩය ජලය විසින් හැඩ ගස්ස ගන්නව. එහෙම වෙන්නෙ ජලය සතුව පවතින දියකර හැරීමේ ගුණය නිසා. ඉතිං “බල ශක්තිය, රසායනිකයන් සහ ජලය” මේ ඔක්කොම එක තැනක තිබුණ වුණත් ඒක තියෙන්නෙ අසීමිත ජල කඳක් පතුළෙ. ජලය හැමදේම දිය කරන්න පුළුවන් නම්, බල ශක්තිය සහ රසායනිකයන් සාගර ජලයේ දිය නොවී තියේවිද? ඇත්තටම දිය වෙනව. හැබැයි එක දවසක්, එක පුංචි හාදයෙක් අහම්බෙන් කරපු අත්වැරැදීමකින් මේක විසඳෙනව.

තාරකා දූවිලි, බල ශක්තිය සහ ජලය මේ තුන්කට්ටුවේ එකතුවෙන් අපි හැමෝගෙම ආරම්භ ජීව අණුව නිර්මාණය වෙනව. ඒක සෛලිකව ආරම්භ වුණු ජීවය බහු සෛලික වෙලා මිනිසා දක්වා පරිණාමය වෙනව. මේ පරිණාමයේ දි අපිට අමතක කරන්නම බැරි මූල ද්‍රව්‍යයක් හමු වෙනව. “කාබන්.” කාබන් නැති තැන පරිණාමය වුණු ජීවයක් නැහැ.

“මම හිතනව, අපේ පාෂාණයෙන් එපිට විශ්වයේ ඇති අනෙකුත් ලෝක පරීක්ෂා කරල බැලුවොත්, අපිට සරළ ජීවයක් හොයා ගන්න හැකි වේවි කියල. ඒකෙ පෙනුම වෙනස් වෙන්න පුළුවන්. ඒක වෙනස් වෙයි. ඒත් අපේ පාෂාණය, ඒක අපිට වැදගත්, ඒකෙ තමයි අපි පරිණාමය වුණේ, ඒක තමයි අපේ ගෙදර”