Westworld [S02: E05] | එහා ලෝකය… (+18)

හොඳයි එහෙනම් මුලින්ම පැහැදිලි වෙනසක් පෙනේවි… මෙතෙක් මේ අපූරු ලෝකය ඔබ වෙත අරගෙන එන්නට වෙහෙසුන කලිදු වාසුක සහෝදරයාගේ උපසිරසක් එක්ක නෙමෙයි අද ඔබට මේ විසකුරු උද්‍යානයේ සැරිසරන්නට සිද්ධ වෙන්නෙ. නමුත් ඉතින් මුලින්ම සමාව ගන්නව මොකද සමහරුන්ට අනුව මගේ උපසිරස ගුණාත්මක නැහැ, නමුත් ඉතින් ඒ කටින් බතල හිටවන උදවිය උපසිරස කරන්නෙත් නැති එකේ අපි හරි කරන්න එපාය…. වැඩියම ඒ ගැන හිතන්න එපා මීලග කොටසෙ ඉදල මේ කතාවෙ නව අයිතිකරුව ඔබට උපසිරස ලබා දෙයි, මේ ඔහුට කතාව වෙනුවෙන් ප්‍රවිෂ්ටයක් ගන්නකම් ඔබ වෙත එන්නට තියන කොටස ලබාදෙන්නට හදන වැයමක් පමණයි, බලන්න අකමැති නම් නොබල ඉන්න ඇහැකි (මම මේ කාටද කියන්නෙ කියන එක ඒ අදාළ පුද්ගලය දන්නව, ඉතින් අනික් කට්ටියට මේක අදාළ නැත.). තවත් කතා ඕන නැහැ කලින් සතිය මතක් කරගෙන ඉම්මු, සමාවෙන්න ඕන වෙනදා ලිපිය වගේ හරබර එකක් නොවෙන එක ගැන ඇත්තටම මෙහෙම කතාවක් බලනකොට නොහිතන දෙයක් තමයි මේ වගේ එකක ලිපියක් ලියන එක කොයිතරම් අමාරුද කියන එක.

කලින් කොටස –

කතාව ආරම්භ වෙන්නෙ මේ සියල්ල වෙනුවෙන්ම තමුන්ගේ මුල්‍යමය දායකත්වය ලබා දුන් ජේම්ස් ඩෙලොස් ගෙන්. අපි දුටුව ඔහු ඇත්තෙන්ම මොන වගේ හේතුවක් නිසාද මෙවැනි අදහසක් වෙනුවෙන් තමුන්ගේ දායකත්වය ලබා දෙන්නට සුදානම් වුනේ කියන එක, නමුත් අපි දකින මොහොත වෙනකොට ඔහු ඒ තීරණය ගැන පසුතැවීමටවත් අදහසක් නැති වුනත් අපි දැක්ක නැවත නැවත ගෙවී යන ඔහුගේ එකම ජීවිතය ස්ථාවර මනසක් නිර්මාණය කරගත නොහැකි නිසා ඔහුට සෑම විටෙකම අත්වෙන ඉරණම… මේ සියල්ල අතරේ ඔහු හා ගැටුන විලියම් අපට කාලය ගෙවී යන හැටි ගැන අවබෝධයක් ලබා දෙන්නට කාරුණික වුනා.

මේ සියල්ල අතර අපි තවත් කෝණයකින් ඩෙලොස් ආයතනයේ සැබෑ අරමුණ දැකගන්නට හැකි වුනා, ඒ බර්නාඩ්ගේ උදව්වෙන් නමුත් ඔහුටවත් මේ අරමුණ එක්වරම නිර්ණය කරගැනීමට නොහැකි වුන හැටි දකින්න ඇති නෙව. ඒ වගේම කලින් කොටස එක්ක මෙතෙක් කතාවෙන් අතුරුදහන් වුන චරිතයක් වුන එල්සි නැවතත් කරලියට පැමිණියා. ඒ බර්නාඩ් එක්ක, නමුත් ඔවුන්ගෙ ආරම්භය නම් ඒ තරම් හොඳ එකක් නොවුන හැටි මතක ඇති, මොකද ඔවුන්ගෙ පෙර අවසානය බොහොම කටුක එකක් වුන නිසාවෙන්.

මේ අතරේ ඩිලෝරස් ඇයගේ සේනාව වගේම විලියම් සේනාවක් එක්ක තනියම සටන් කරන හැටිත් අමතක නැතුව ඇති කියල හිතනව… මේ සියල්ල එක්ක අපි තවත් අලුත් චරිතයක් වෙනුවෙන් පසුගිය සතියේ කතාව වෙන් කළා… ඇය නතර වුනේ තමුන්ගේ පියා හමු වීමෙන්….

ඉතින් ඔය පොඩි මතක් කිරීමක් සමාවෙන්න සියලුම විස්තර නැති එකට, ඇත්තටම එහෙම කරන්නට හේතුව ලිපිය කියවන කෙනෙක්ට පසුගිය කොටස නොබල ඉන්නට බැරි වෙන්න වැඩ සිද්ධ කරල යුතු නිසා.

අද කොටස –

අද සැබවින්ම මේ කතා මාලාව තවත් ලෝකයක් කරා තමුන්ගේ චිරිත ගෙන යන්නට සමත් වෙනව, මේ ලෝකය අපි ඉගි වශයෙන් දැක්ක නමුත් සැබවින්ම නොදැක්ක ලෝකයක්… ඒ තමයි පුරාතන ජපානය… කලින් කොටසටත් කලින් අපි දැක්ක මේව් වෙත දිව අන්ධකාරයේ එන චරිතයක් ඒ කවුද වගේම ඔහුගේ ඉතිහාසයෙන් බිදකුත් දැකගන්නට හැකි වෙනව වගේම ඔබට අද පුරාතන ජපානයේ චරිත වගේම ඔවුන්ගේ වැඩ කටයුතු යුද්ධ එහෙමත් දැකගත හැකි වේවි. නමුත් මේ සියල්ල එක්ක අපි මෙතෙක් පරිපුර්ණ උද්‍යානයක් ලෙස දැක්ක මේ අසිරිමත් උයනේ තවත් එක කෝණයක් දකිනව, මම හිතන හැටියට ඒ කෝණය ඉස්සරහට අපිට වැදගත් වගේම බොහොම ප්‍රබල එකක් වේවි… ඒ මේව් සහ ඔබ අද දකින තවත් චරිතයක් නිසාවෙන්.

මේ සියල්ල අස්සේ ඩිලෝරස් තමුන්ගේ ආදරය ගැන ජීවිතය ගැන නැවතත් සිතා බලන කොටසක් ලෙස අද කොටස ඔබට දැකගත හැකි වේවි.. නමුත් සත්තයි ඒ අවසානය සුභදායක එකක් නම් නෙමෙයි… අද ගොඩක් සාම්ප්‍රදායික සටන් තියන කොටසක් නමුත් නව ලොවක් නිසාම අද අපිව ව්‍යාකුල කරන දේ බොහොම අල්පයි වගෙයි පෙනුනෙ ඉතින් එහෙනම් අද කොටස ගැන මේ කිව්ව දේට තවත් එක දෙයක් එකතු කරන්නම්… ඒ අද කොටස තුල මේව් තමුන්ට ඇති අලුත්ම හැකියාවක් සොයාගැනීමට සමත් වෙනව… සැකයක් නැහැ මේක බොහොම වැදගත් එකක් වේවි.. පොඩ්ඩක් සංගීතයටත් අවධානය යොමු කරන්න අද දවසේ… මොකද එකත් ලොකු හෝඩුවාවක්….

එහෙනම් මේ කොටස බලන්න, ඊලග කොටසින් අලුත් වයසක අයිතිකරුවෙක් ඔබ හා එක්වේවි මේ කතා මාලාව කරපින්නාගෙන යන්නට… අවසාන වශයෙන් මෙහෙම කියන්නම් Game of Thrones මෙන් ඔබ තිරයේ මැරෙනව දකින තුරු කිසිම කෙනෙකුගේ ඉරණම ගැන විශ්වාසය නොතියන්න, ඔබ එලෙස දුටුවත් ඒ ඔවුන්ගේ අවසාන ඉරණම නොවේවි…. එහෙනම් ආයෙත් උපසිරසක් එක්ක හමුවෙමු, එතෙක් ඔබට ජය වේවා !!!

පා.ලි.

කතා මාලාව වෙනුවෙන් කරන ලද විවරණය කලිදු වාසුක සහොයුරා විසින් දිගටම කරගෙන යන බැවින් ඔබට මේ කතා මාලාවේ මුහුණත වටිනාකමට එහා ගිය තවත් තොරතුරු මංසල තුලින් ඉක්මනින් දැකගත හැකි වේවි.